CONTOH NASKAH PIDATO BAHASA BALI

BASA BALI PATUT LESTARIANG

MUAH WERDIANG

Majeng ring penganter acara titiang matur suksema antuk galahe sane kapaica ring titiang. Sadurung titiang nguninayang atur, pinih riin titiang ngaturang pangastungkara, Om Swastyastu !

Bapak kepala sekolah sane wangiang titiang, para ibu, bapak guru sinamian,para dewan juri, muah para semeton, sisia ring SMP III puniki ane sutresnain titiang.Inggih para semeton sinamian, ngiring mangkin sareng sami mulat sarira, nyinak nyliksikin raga soang-soang. Sampun para semeton sinamian sutindih ring bsa bali druene? Kasujatinipun, basa punika pinaka wadah, genah nampedang, ngampilang mangda tan ical, saisin pakayunan muah parisolah, sane kawastanin kabudayaan.

Para turise sami angob ring kawentenan kabudayaan baline.Kabudyaan baline kasub ring jagat dura negara. Para turise rauh ke bali, gumanti ipun jaga ngarasayang kebecikan muah karasminan jagat bali, sane kahias antuk kabudayaan. Baline polih juluk “pub dewata” saantukan supenuh antuk pura, antuk aneka rupa kesenian, kesenian purwa miwah anyar. Sarahina wenten karmagiang yajnya upacara, para krama desane sumirah sakadi tan wenten pikobetipun. Sarahina wipun miragi tatabuhan sane ngulangunin miwah unen-unenan sane ngangobin. Meweh ngrereh saih indik kalewihan baline ring jagat teosan.

Punika mawinan mabuat manah titiang mangda para semeton sami, para sisia iriki kayu teleb malajahin basa lan sastra bali druene. Manut pangandikan anak lingsir-lingsir, ring basa Bali muah ring pustaka Baline, madaging pangweruh miwah kawicaksanaan sane kalintang lewih. Minakadi madaging satua, tutur, paribasa,geguritan,miwah kasustraan, sakadi sane kaajahin antuk ibu guru. Yadiastun  titiang nenten tatas uning ring daging pustaka punika, nanging sampun karasa antuk titiang . Ritatkala  Ibu guru maweh ajah-ajahan miwah matutur antuk basa bali, yakti titiang ngrerep, tur teleb ngranjing ring manah titiang, matur suksema ring ibu guru sane baktini titiang.

Ampura ibu guru taler bapak guru, muah sameton para sisia sinamian. Titiang marasa iri ring mata pelajaran sane lianan, sakadi basa indonesia,basa ingris,muah sane lianan. Kadulurin malih antuk tan wenten piranti minaskadi sane angge nglimbakang paplajahan basa muah kasustraan bali. Titiang meled mangda ring perpustakaan wenten buku-buku, papacan sastra sane mabasa bali, napi malih buku sastra sane anyar.

Sapunika tutur ibu guru sane baktinin titiang, mangda kayun ngrurukang sisiane sumeken mabasa bali. Yening tan asapunika, janten paplajahan basa baline ring kelas, kirang nutdut minat, kirang kauratiang. Basa baline pacang nguredang, sekadi patapan rokone,raris padem.

Pare semeton sinamian, yenig basa baline nguredang, manawita jati ragane taler  nguredang kabudayaan baline nguredang mangentos antuk kabudayaan asing .Asing anak  Bali pacang terasing. Saantukan sapunikapara sameton ,ngiring  ja sareng sami mangda eling ring raga ,matangin saking kaleplep sirep antuk kasirsiran angin kabudayaan asing .

Basa Bali punika kabaos salah sannggal saka wiadin pilar sane ngajegang Baline .Ngiring mangkin sareng sami ngalestariang muah ngawerdiang basa Bali druene,antuk teleb malajahin.Angge sararina ,angge basa gaul ,ring jero, ring pangambiaran ,ring mabligblagan ,mawidyatula,ring maplalianan muah sane lianan.

Om Shantih Shantih Shantih Om